|
Antonio ('Ntunucciu') Sierra è un settantaseienne brindisino da tempo trasferitosi al nord, per lavoro.
In uno dei tanti momenti di nostalgia ha voluto ricordare la vecchia ricorrenza della Pasqua.
Dice: "mi auguro comunque che apprezzerete chi, pur lontano dalle "sciabbiche", si sente sempre legato alla sua terra".
Grazie 'Ntunucciu'
Sarà ca mi st’anvecchio?
la nostalgia mi fotti?
‘na cosa, però, è certa:
quando li festi ‘rrivunu,
Natali o Capudanno,
Pasca o Carnivali,
pì lu cirvieddu passunu,
comu n’u film’anticu
pinsieri e pirsunaggi
di tiempi assai luntani.
Doci era la Pasca:
la “gloria” a ‘mmenzatia,
cù trenuli e campani,
cù priesciu e alligria!
Patani cù l’agnellu,
unguli e casu friscu,
taraddi sciluppati,
pupi cù l’ovu allessu.
Po’ ‘nc’era lu Pasconi:
frittati di cucuzza,
puddica cù l’aulii,
biscuetti e ppummitori,
‘mberu alla “Sciaia”,a mari,
o ‘ammienzu all’erva fresca
sobbra allu Casali.
Mò Pasca è a menzanotti,
nisciuni cchiù ‘nci pensa,
ognuno si ‘ndi fotti.
Si mangia al ristorante:
“capretto in fricassea,
“con patè di fegato
“e mousse di fragoline”;
si fà il “picche nicche”
si torna a casa stanchi
dopu ori di machina
in coda a strulicari!
E’ propriu festa questa?
Non era megghiu prima,
quandu ‘ndi ccuntintaumu
di mangiari picca e buenu
cù l’addori di cucina
e noni, come a moi, di
vileni e binzina ?
Pinsatici, vagnuni:
io ormai sò vecchiu,
ma ‘na cosa vi dicu:
và bene lu progressu,
ma ogni tantu ricurdativi
ca ‘nc’è stata ‘ na vota
quandu li nanni vuestri
cù picca erunu cuntienti
e campavanu beati,
prisciati e scuscitati.
Tonino
|
