L'atra notti, cu l'amici,
quand'assii di la cantina,
'mbirlisciandu mi truvai
propria abbasciu alla Marina.
Ccè silenziu ca 'nci stava
e nu vientu toci toci,
ca paria nu campusantu,
mancu n'alitu di voci.
Ogni tantu nu dirruttu
rintronava ' ntra la notti
e la panza mi paria
comu sia ca era na votti.
All'azari di la capu
mi scappau "Pi la Matonna!
cqua lu Sinducu o la Giunta
s'è futtuta la culonna"
Mi pinzava ca lu mieru
sta facia nu brutt'effettu
ca li uecchi mi cicava:
era scè fucendu a liettu.
Era colpa di la fezza?
O lu suennu ca purtava?
Doppu sieculi di storia
la culonna no' ci stava!
E chiangendu mi ssittai
comu ci era nu vagnoni,
'ntra la capu mi tuzzava
nu martieddu e nu cintroni.
No 'bbastava lu Tirlosci
e puru lu Tiatru
di sicuru quarchitunu
la culonna s'è sballatu!
E facendu sti pinzieri
intr'a'mmei a ddu mumentu,
mi girai all'intrasattu
e uardai lu Monumentu;
menu mali, stava addai,
non ndi l'erunu purtatu,
benedetta la Matonna,
san Ghiatoru sia lodatu!
Mo' è già na sittimana
ca mi corcu allu Casali
cu la menza di lu vinu
e 'na cosa di mangiari.
Uardu fissu lu timoni
no' lu lassu nu momentu
ci no' certu si'ndi portunu
puru statru monumentu.
|